श्रीविशालामहाकालशिप्राङ्गणे
पाणिनेर्विश्वविद्यालयो राजते ।। (ध्रुवपङ्क्तिः)
श्रीविशाला...............
वेदवेदाङ्गसाहित्यशिक्षाकला-
योगवेदान्तशास्त्रादिमीमांसया ।
कालिदासादिविद्वत्प्रभाभाषिता
सा सभा विक्रमस्य प्रवृत्ता पुनः ।।1।।
श्रीविशाला...............
धाम्नि सान्दीपनेः कृष्णभक्त्यन्विते
मुक्तये ब्रह्मनिर्वाणशीला वयम् ।
भौतिकं मङ्गलं शक्तिमाध्यात्मिकीं
नैतिकोत्कर्षरीतिं च शिक्षामहे ।।2।।
श्रीविशाला...............
विश्वबन्धुत्वभावैकलक्ष्योन्मुखो
राष्ट्रनिर्माणकार्ये च दीक्षारतः ।।
संस्कृतं नाम दैवीं गिरां संस्कृति-
मुद्यतोऽयं पुना राजितुं भूतले ।।3।।
श्रीविशालामहाकालशिप्राङ्गणे
पाणिनेर्विश्वविद्यालयो राजते ।।
